AS RUTAS EN BICICLETA.
Unha forma de coñecer a Illa é utilizando a bicicleta, para iso, este municipio conta cunha serie de tramos onde poder facer cicloturismo. Comezando por cruzar a ponte podemos percorrer unha parte da orografía da Illa. Poderemos facer rutas en bicicleta bordeando prácticamente toda a Illa.
O noso punto de partida e de fin vai ser o entorno do Bao. Iniciaremos esta andaina na Praia da Canteira ata chegar ó Porto principal da vila, o Porto do Xufre, pasando polo entorno da Sapeira, Cabodeiro, Furado e Aguiuncho onde poderemos ver estampas tan mariñeiras como as dornas, portos, bateas e como non as súas xentes traballando no mar. Continuaremos polo Paseo Marítimo do Xufre ata chegar o entorno de Area da Secada, bordeando así a zona norte da Illa, e contemplar o outro lado da Ría de Arousa. Retomaremos esta ruta no Paseo Marítimo da Ribeira do Chazo continuando pola Abilleira para chegar ó Espazo Natural do Carreirón, percorreremos esta paraxe protexida e continuaremos pola beira das praias observando esa ponte de dous kilómetros de lonxitude até chegar de novo ó Bao.
AS RUTAS DE SENDEIRISMO.
A Ruta dos Cons.
Dividida en dous tramos esta ruta discorre, na súa maior parte, por toda a vila.
O seu trazado comprende tanto a zona norte como a sur, alternando ó paso zonas selvaxes como o Espazo Natural do Carreirón, as praias, os miradoiros e as diferentes puntas que comprenden A Illa. O seu percorrido é todo natureza, marcas mariñeiras e vistas panorámicas.
Ten unha lonxitude aproximada de 7 quilómetros e unha duración de catro horas e media a pé aproximadamente onde se xunta camiños de terra, asfalto, praias e paseos de madeira, así como a mestura da natureza, a vexetación, o mar, a paisaxe e o urbano.
ZONA NORTE.
A ruta comeza visitando a Punta Cabalo onde atoparemos os primeiros cons a destacar, os Cons da Praia do Faro, os Cons da Escorregadoira, Con de Navío e Con de Tres Pés. Bordeando toda a zona Norte podemos contemplar ademáis da singularidade destes cons, o lugar onde están situados, ofrecendo ó visitante unha vista das praias e monte do concello, así como, toda unha panorámica da Costa do Barbanza. Un pouco máis adiante están o Con da Barbafeita e o de Niño de Corvo onde se pode ver o Illote Xidoiros Areoso e a boca da Ría.
Continuamos por esta zona até chegar ó Agro de Alonso onde atopamos o con dese nome; moi preto de aquí esta o Con da Abella, e moi próximo a el Conretellado. Depois subiremos ó Con do Forno onde está emprazado o mirador de “O Santo “, e dende aquí poderase contemplar unha panorámica prácticamente toda A Illa. Neste mesmo lugar localizamos tamén o Con da Grañeira.
ZONA SUR.
A ruta Sur comeza no lugar de Abilleira, pasando polo Monte do Muiño do Vento, podendo contemplar dende alto o Illote Xidoiros Areoso e Xidoiro Pedregoso; o Con do Castro de Quilma, en Quilma; os Cons do Parque Natural do Carreirón, e o Con do Crocodilo, en As Salinas. Todos eles, emprazados preto das praias de area fina máis maravillosas deste Concello. Ademáis de permitir ao visitante un contacto coa Natureza en estado puro. A ruta sur ofrece inesquecibles vistas ós concellos colindantes de O Grove, Cambados e Vilanova de Arousa.
A Ruta dos Pilros.
A Ruta dos Pilros discorre polo Espazo Natural do Carreirón, na zona sur da Illa de Arousa. Esta ruta ten unha extensión de entre dous e tres quilómetros e medio de lonxitude aproximadamente e unha duración de entre unha e dúas horas e media.
Durante o seu percorrido descubriranse moi variados ecosistemas: rochedais, pequenas e grandes calas, dunas, marismas e lagoas. Ó mesmo tempo, pódense contemplar os traballos en batea, a pesca de baixura e o marisqueo a pé e a flote; ademais de observar aves acuáticas nas épocas migratorias.
Esta ruta comeza no istmo de Punta Carreirón, onde se observará a mestura de vexetación dunar coa vexetación propia doutros ecosistemas xa fixos.
Continuarase bordeando o litoral da Ensenada da Brava onde se atoparán observatorios de paxaros e poderanse ver moitas aves limícolas. Nos seguintes tramos do percorrido atravesaranse dunas, calas e marismas nunha avanzada fase de compactación, así como a presenza dunha lagoa que serve de refuxio das aves migratorias e un pequeno bosque.
O final do tramo discorre por chan de fina area cuberto de líquens arborescentes e matas de toxo que limitan coa vexetación dunar.
A mellor época para poder facer esta ruta polo Espazo Natural do Carreirón é na primavera, despois das choivas invernais, cando aparecen os primeiros raios de sol e as primeiras aves migratorias comezan a chegar e aniñar para poder marchar cando as primeiras follas das árbores empezan a cair. Pódese apreciar o silencio da natureza, os piares das aves e o quédecir do mar, ó tempo que se respira un ar puro e tranquilo.
