Comprende o seu trazado unha traxectoria pola zona norte e a zona sur da Illa, alternando ó seu paso zonas selvaxes como o Parque Natural do Carreirón, as praias, os miradoiros e as diferentes puntas que comprenden A Illa. O percorrido é todo natureza, marcas mariñeiras e vistas panorámicas.
Ten unha lonxitude aproximada de 7 quilómetros e unha duración de catro horas e media a pé aproximadamente onde se mesturan camiños de asfalto, area,... o rural e o urbano.

ZONA NORTE
A ruta comeza visitando a Punta Cabalo onde se atopan os primeiros cons a destacar, os Cons da Praia do Faro, os Cons da Escorregadoira, o Con de Navío e o Con de Tres Pés. Bordeando a zona Norte pódese contemplar ademais da singularidade destes cons, o lugar onde están situados, ofrecendo ó visitante unha vista das praias e monte do municipio, así como, unha panorámica de toda a costa do Barbanza. Un pouco mais adiante están os Cons da Barbafeita e os de Niño de Corvo desde os que se poden contemplar os illotes de Xidoiros Areoso e Xidoiros Pedregoso e a boca da Ría.

Continuando por esta zona chégase ó Agro de Alonso onde se atopa o con dese nome; moi preto de aquí está o Con da Abella, e moi próximo a el Conretellado.
Despois sóbese ó Con do Forno onde está emprazado o miradoiro de ¿O Santo¿, e desde aquí pódese apreciar unha panorámica de practicamente toda A Illa. Neste mesmo lugar localízase tamén o Con da Grañeira, preto dunha fonte e un estanque.

ZONA SUR
A ruta Sur comeza no lugar de Abilleira, unha das primeiras zonas poboadas de A Illa, continúase polo Monte do Muíño do Vento, podendo contemplar desde o alto os Illotes de Xidoiros Areoso e Xidoiros Pedregoso; o Cons de Quilma. Continúase até chegar as puntas e rochas do Parque Natural do Carreirón, finalizando có Con do Crocodilo, nas Salinas.
Todos eles emprazados preto das praias de area fina mais marabillosas deste Concello, ademais de permitir ó visitante un contacto coa Natureza en estado puro. A ruta sur ofrece inesquecibles vistas ós concellos veciños.

A Ruta dos Pilros discorre polo Parque Natural do Carreirón, na zona sur da Illa de Arousa. Esta ruta ten unha extensión de entre dous e tres quilómetros e medio de lonxitude aproximadamente e unha duración de entre unha e dúas horas e media.

Durante o seu percorrido descubriranse moi variados ecosistemas: rochedais, pequenas e grandes calas, dunas, marismas e lagoas. Ó mesmo tempo, pódense contemplar os traballos en batea, a pesca de baixura e o marisqueo a pé e a flote; ademais de observar aves acuáticas nas épocas migratorias.

Esta ruta comeza no istmo de Punta Carreirón, onde se observará a mestura de vexetación dunar coa vexetación propia doutros ecosistemas xa fixos. Continuarase bordeando o litoral da Ensenada da Brava onde se atoparán observatorios de paxaros e poderanse ver moitas aves limícolas. Nos seguintes tramos do percorrido atravesaranse dunas, calas e marismas nunha avanzada fase de compactación, así como a presenza dunha lagoa que serve de refuxio das aves migratorias e un pequeno bosque. O final do tramo discorre por chan de fina area cuberto de líquens arborescentes e matas de toxo que limitan coa vexetación dunar.